После текстот што го напишавме за мали добри дела во секоја џума (петок), денес добивме прекрасен пример што вреди да се запамети: еден човек тивко, без да сака некој да го знае, ги платил сите лебови во една продавница. И така, секој што влегол, наместо да ја извади својата паричка, слушнал само: „Аџо, денеска лебот ви е платен.“

Ваквите дела не се мерат по бројки, по вредност или по тоа кој ќе ги види. Тие се мерат по чистината на срцето. Некој ќе си замине со изненадена насмевка, друг ќе се почувствува охрабрен, а сите заедно ќе научиме уште еднаш дека вистинската убавина е во делењето и во тоа да мислиш на другиот.

Оваа традиција не е нова меѓу нас. Особено во месец Рамазан, низ целата земја и свет, муслиманите се натпреваруваат во добри дела – се дава садака, се купува за другите, се помага, се дели. И секое такво дело остава трага што не се брише.

Аллах да ги награди сите што со скриени раце и со чисто срце прават добро. Нивното име можеби никој нема да го знае, но наградата нивна е кај Аллах.

Ајде да продолжиме со оваа традиција – денес еден, утре друг, и чекор по чекор да изградиме синџир на добрина што нема крај.