Со одлука на Владата на Република Северна Македонија донесена на 6 мај 2025 година, еднострано е раскината концесијата за експлоатација на минерални суровини – габро на локацијата кај Стрижак, планината Јабланица, во близина на с. Лабуништа. Одлуката стапува на сила од 9 мај 2025 година, со што официјално завршува заканата за уништување на природното богатство на овој предел.

Оваа победа не дојде случајно – таа е резултат на несебичната, истрајна и храбра борба на народот од Лабуништа. Граѓаните, обединети и решителни, денови и ноќи кампуваа на Стрижак, бранејќи ја својата земја, планина, вода и иднина. Во првите редови стоеше здружението Натура Лаб – еколошки борци со визија и срце, кои успеаја да ја мобилизираат заедницата, да подигнат свест и да ја одбранат природата.

Лабунишани докажаа дека кога народот е обединет, ништо не е невозможно.

Тие дадоа пример за целата држава – дека љубовта кон родната земја, гласот на правдата и упорноста се посилни од секоја концесија и интерес.

Голема благодарност до секој поединец што стоеше на Стрижак, до секој што го крена својот глас, до здружението Натура Лаб за нивната посветеност, лидерство и истрајност. Оваа победа е наша – оваа победа е за идните генерации!

Стрижак останува зелен – Лабуништа ќе си го чува срцето на Јабланица.