Жителите на живописното село Лабуништа, сместено во срцето на планината Јабланица и познато по своите магични леднички езера, упатуваат искрен повик до сите посетители: сакајте ја и чувајте ја природата како драгоцено наследство.

„Нашите езера се чисти и стари илјадници години. Секое од нив е уникатен еко-систем кој ги хранел и напојувал нашите претходни генерации и заслужува да го чуваме со особена почит. Ве молиме, не фрлајте отпадоци, не ја загадувајте шумата и не се капете во ледничките води – тие се мошне чувствителни“, велат Лабуништаните со длабока грижа за иднината.

Иако постојат строги регулативи за заштита на природното богатство, Лабуништаните со отворено срце ги пречекуваат сите љубопитни патници, планинари и љубители на мирот. „Секој е добредојден, но важи едно правило – дојдете со почит. Природата не е само туристичка атракција: таа е жив организам што дише заедно со нас“, додаваат жителите.

Дополнително, апелираме и до сите кои ги промовираат убавините на Јабланица – да имаат предвид дека најголем дел од овие природни бисери, вклучително и самите леднички езера, се наоѓаат во атарот на Лабуништа, како дел од Лабунишките убавини. Токму затоа, важно е убавината што ја споделуваме со светот да оди рака под рака со вистината и одговорноста кон заедницата што се грижи за нив.

Нека Лабуништа остане пример за хармонија меѓу човекот и природата. Посетете ја со отворено срце и оставете само спомени – не отпадоци.